பாடசாலை தொழிநுட்ப மதிப்பீட்டுக்குழு (Technical Evaluation Committee) — முழுமையான வழிகாட்டி   

க. றதீஸ்வரன், SLPS  |  2026 ஜூலை 01

பாடசாலைப் பெறுகைச் செயற்பாடுகள் வெளிப்படைத்தன்மை, தரம் மற்றும் பொறுப்புக்கூறலுடன் இடம்பெறுவதற்காக அமைக்கப்படும் முக்கிய குழுவாக பாடசாலை தொழிநுட்ப மதிப்பீட்டுக்குழு விளங்குகிறது. கொள்வனவு செய்யப்படும் பொருட்களின் தரம், விவரக்குறிப்பு மற்றும் பொருத்தத்தன்மையை தொழில்நுட்ப ரீதியாக மதிப்பீடு செய்து பெறுகைக்குழுவிற்கு பரிந்துரைகளை வழங்குவதே இதன் பிரதான பொறுப்பாகும்.

இக்கட்டுரையில்:

1. குழுவின் கட்டமைப்பு
2. குழு அங்கத்தவர்களைத் தெரிவு செய்யும் முறை
3. தொழிநுட்ப மதிப்பீட்டுக்குழுவின் செயற்பாடுகள்
4. முடிவுரை

குழுவின் கட்டமைப்பு

பதவி	பொறுப்பு
பிரதி அதிபர் / உதவி அதிபர் / பிரிவுப்பொறுப்பாளர்	தலைவர்
சிரேஷ்ட ஆசிரியர் ஒருவர்	முதல் உறுப்பினர்
உரிய துறை/விடயம் தொடர்பான அறிவும் அனுபவமும் கொண்ட ஆசிரியர்	இரண்டாம் உறுப்பினர்

குழு அங்கத்தவர்களைத் தெரிவு செய்யும் முறை

ஒரே நபர் பாடசாலைப் பெறுகைக்குழுவிலும் மற்றும் தொழிநுட்ப மதிப்பீட்டுக்குழுவிலும் உறுப்பினராக இருக்க முடியாது. ஆனால், இரு குழுக்களும் ஒன்றாக இயங்க அனுமதிக்கப்பட்டுள்ள சந்தர்ப்பங்களில் இது பொருந்தாது.

ஆசிரியர்கள் போதியளவில் இல்லாத பாடசாலைகளில் பின்வருமாறு செயற்பட வேண்டும்:

(அ) 5 அல்லது அதற்கு குறைவான ஆசிரியர்கள் உள்ள பாடசாலை

பாடசாலைப் பெறுகைக்குழுவை மட்டும் நியமித்தால் போதுமானது.

(ஆ) 3 அல்லது அதற்கு குறைவான ஆசிரியர்கள் உள்ள பாடசாலை

அனைத்து ஆசிரியர்களும் பாடசாலைப் பெறுகைக்குழுவாக செயற்பட வேண்டும். தொழிநுட்ப மதிப்பீட்டுக்குழுவின் பணிகளையும் இதே குழுவே மேற்கொள்ள வேண்டும்.

தொழிநுட்ப மதிப்பீட்டுக்குழுவின் செயற்பாடுகள்

1. முன்னுரிமைத் திட்டமிடல்

• கற்றல்–கற்பித்தலுக்குத் தேவையான நுகர்வுப் பொருட்களின் பட்டியலைத் தயாரித்தல்.
• அவற்றிற்கான விவரக்குறிப்பு (Specifications) மற்றும் தரநிலைகளை (Quality Standards) தயாரித்தல்.
• ஆண்டின் இறுதியில் இவ்வாவணங்களைப் பெறுகைக்குழுவிடம் சமர்ப்பித்தல்.

2. விலைமனுக்களை மதிப்பீடு செய்தல்

(அ) விலைமனுக்களை ஆய்வு செய்தல்

• அனைத்து விலைமனுக்களையும் பரிசீலனை செய்தல்.
• விதிமுறைகளுக்கு முரணான அல்லது வழங்குநரின் கையொப்பமில்லாத விலைமனுக்களை நிராகரித்தல்.
• நிராகரிப்பிற்கான காரணங்களை எழுத்துமூலமாக பதிவு செய்து குழு உறுப்பினர்கள் கையொப்பமிடல்.

(ஆ) கணிப்பீடுகளை சரிபார்த்தல்

• விலைமனுக்களில் உள்ள கணக்கீடுகள் சரியானவையா என்பதை பரிசீலித்தல்.
• பிழைகள் இருப்பின் திருத்தம் செய்தல்.
• மேற்கொள்ளப்பட்ட திருத்தங்களை தொழிநுட்ப மதிப்பீட்டு அறிக்கையில் பதிவு செய்தல்.

(இ) விலைமனுக்களை தரவரிசைப்படுத்தல்

• மொத்த விலை அடிப்படையில் குறைந்த விலையிலிருந்து அதிக விலைக்கேற்ப வரிசைப்படுத்துதல்.
• குறைந்த விலைமனுவை முதலிடத்தில் குறிப்பிடுதல்.

(ஈ) பரிந்துரைகள் வழங்குதல்

• தொழிநுட்ப மதிப்பீட்டின் அடிப்படையில் பெறுகைக்குழுவிற்கு பொருத்தமான வழங்குநரைப் பரிந்துரைத்தல்.

3. போக்குவரத்துச் செலவு

பொருட்கள் பாடசாலைக்கே கொண்டு வந்து ஒப்படைக்கப்பட வேண்டியதால், போக்குவரத்துச் செலவையும் விலைமனுவில் தனியாக குறிப்பிடுமாறு வழங்குநர்களுக்கு அறிவுறுத்துதல்.

4. பொருட்களின் தரத்தை உறுதிப்படுத்தல்

• அங்கீகரிக்கப்பட்ட விவரக்குறிப்பு மற்றும் தரநிலைகளுக்கு ஏற்ப பொருட்கள் வழங்கப்பட்டுள்ளனவா என்பதை ஆய்வு செய்தல்.
• பொருட்களின் தரம், அளவு மற்றும் பொருத்தத்தன்மையை உறுதிப்படுத்தி பெறுகைக்குழுவிற்கு அறிவித்தல்.

முடிவுரை

பாடசாலை தொழிநுட்ப மதிப்பீட்டுக்குழு என்பது பாடசாலைப் பெறுகைச் செயற்பாடுகளில் வெளிப்படைத்தன்மை, தர உறுதி, நிதி ஒழுங்கு மற்றும் பொறுப்புக்கூறல் ஆகியவற்றை நிலைநிறுத்தும் முக்கிய அமைப்பாகும். இக்குழு வழங்கும் தொழில்நுட்ப மதிப்பீடுகள் மூலம் தேவைக்கேற்ற, தரமான மற்றும் சிக்கனமான பொருட்களைப் பாடசாலைப் பெறுவதற்கு வழிவகை செய்யப்படுகின்றது.

✍️ ஆசிரியர்: க. றதீஸ்வரன், SLPS